2011-12-01 萬凰之王外傳 - 自助餐

又來飯局！是晚選址金鐘 JW Marriot「The Lounge」，自助餐 8pm 時後入座收 $295+10%，酒精類飲品另計，食物的質素與選擇也算不錯，大家可以試試。

話說上次吃蒲飛已是大半年前的事 (請參閲舊文 2011-02-03 初一Brunch自助餐推介)，皆因自助餐一向不是本人杯茶，不喜歡行出行入的感覺；加上人多多時有時會推推攘攘，食客心態就仿如「萬凰之王」般的宮廷內鬥，可謂見盡人生百態。

以下是一些心聲例子 (圖片只是當日自助餐的隨影，並不是含沙射影啊) 。

1. 沅宛皇后「胡囧囧」：「啍，本宮作為六宮之首，我食蒲飛一定要回本！」

吃自助餐吃得不夠多，有些人會覺得蝕抵，所以唯有狂食狂擦。本少爺覺得既然要花錢，但又不想白白浪費金錢，硬要肚皮受罪，這心態是否有點問題呢 ?! 如果有這想法，最好就不要吃自助餐啦，用幾百蚊散點喜歡的食物再大家互相share 咪重好。

2. 伊蘭皇后：「本宮咁好心地，不如做好心幫朋友攞埋啦。。。」

有些好心的朋友見到較貴的美食例如煎鵝肝、龍蝦之類，會不禁取多幾件給同桌的朋友們，成枱都係，這樣反而會令同桌的朋友尷尬。攞食物最好的原則就是：自己攞自己的！

3. 皇太后「濃湯寶」：「夾食物的份量要大大碟，無份量又點襯得起本皇太后！」

就是這種「要有睇頭」的心態，有些人會搏命去搶去㚒，每碟都滿滿但又食唔哂。其實吃自助餐應盡量少吃、多款，這既可避免浪費食物，又可多試不同的口味。

4. 昏君皇上：「朕不嬲口水多過浪花，又如何？ 」

自助餐為方便食客不用將食物揭來揭去，很多時都沒有蓋上鍋蓋，但很多食客還是會對著食物高談濶論，完全無諗過啲口水會噴哂落食物度。不要得！

5. 貪得無厭的彩藍「定欣」：「貴嘢只會出一、兩次，唔搶就笨喇！」

據鄙人觀察，最人多擁去搶的食物都係壽司類、三文魚、生冷嘢 (如凍螺、蝦、海鮮)、雪糕之類，其實都唔係啲咩特別貴嘢。反而原隻燒的牛扒、羊脾，廚師即製意粉等，這些功夫菜很多時卻乏人問津。再講，食咁多生冷嘢，最後搞到胃痛又疴又嘔咪仲辛苦。

6. 自私的瑞親王「何陳山 x」:「嘩，啲燒大蝦要排咁耐，輪到本親王時一定要攞多幾隻。」

通常較多人輪的食物，當輪到自己時，有些人便會要求廚師給予太多數量，例如個檔口一次過只能燒 10 塊鵝肝，有人一次過就攞幾件，咁後面啲人點呢？這完全是只顧自己而不理會他人感受。

7. 最後出場的崔嬤嬤「程可為」：「我無乜幾何食好嘢，等我餓足十幾個時辰先去，咁咪可以食多啲嘢囉！」

錯唔哂。但若果等到非常肚餓先去食，即使是味道普通的食物，也可能會狼吞虎嚥的吃進肚裏，進食速度太快對身體都不好啦。 

Well，最後，本少爺在此預祝「胡囧囧」攞視后，「濃湯寶」攞最佳女配角啦！

「JW Marriott Hotel The Lounge」

地址 : 金鐘金鐘道88號太古廣場香港JW萬豪酒店大堂

電話 : 2810 8366