唔知大家覺唔覺得，係澳門有好多美食及五光十色嘅娛樂，但係就比較少一啲似蘭桂坊咁熱鬧嘅酒吧街。
最近新濠天地舉行了「SOHO Friday」，逢星期五晚 7pm - 9pm，只要俾入場費MOP150蚊，就可以係三間餐廳兩小時內任飲超過20款紅、白、啤酒。
上個禮拜五我就去咗SOHO，一入場時俾我感覺氣氛就好似蘭桂芳一樣！場地中間擺滿枱櫈，人客買飛後就可以隨意品嚐美酒，在場我見到全場爆棚，人客係多到滿場飛。
當晚仲有個相當nice既帥哥大玩花式調酒交替表演，將魔術同拋樽技巧合二為一，有姿勢有實際，視覺感受瞬時加分！另一個氣氛好正，原因係有現場 live music 表演，音樂可以話係氣氛嘅催化劑，有咗佢，成個會場同心情都立即輕鬆哂！
而且我幾款紅白酒都有飲到，感覺上質素唔錯，都有好多款選擇，以 MOP150蚊黎講可以話係相當抵。查實一大班朋友飲飲食食，我覺得就係最正嘅公餘放鬆活動。
係路中間我見到有一架爆谷車，原來係可以免費俾人客隨意攞黎食，我就係好鍾意依種即興好 chill 嘅感覺。
到咗大概8:45pm，忽然全場熄燈，仲有舞蹈員出黎表演跳舞，係燈光四射之下，舞蹈員跳住Candy Man dance，觀眾係圍觀之餘都有影相同拍手，將全晚氣氛推至高潮！
其實淨係飲酒有少少 dry，我見到小食Menu嘅選擇都有好多，所以我就隨意叫碟「炸雞薯角」黎送下酒，兩者都炸得脆卜卜，又唔會太油膩。
「新濠天地蘇濠」
地址：氹仔舊城區氹連貫公路新濠天地新濠大道二樓